25 лістапада, Мінск /Кар. БЕЛТА/. Больш за 200 дадатковых паяздоў ужо назначыла Беларуская чыгунка на навагоднія і калядныя святы, паведамілі БЕЛТА ў прэс-цэнтры БЧ.
Для дастаўкі пасажыраў у перыяд з 24 снежня па 12 студзеня ў міжнародных зносінах з Расійскай Федэрацыяй ва ўзаемадзеянні з ААТ "РЧ" дадаткова назначана больш за 60 паяздоў па папулярных напрамках: Мінск - Масква, Брэст - Масква, Полацк - Масква і Мінск - Санкт-Пецярбург.
Продаж білетаў на паязды ўжо адкрыты. Рэалізацыя праязных дакументаў на паязды ў міжнародных зносінах з Расійскай Федэрацыяй адкрываецца за 90 сутак да іх адпраўлення з пачатковай станцыі, нагадалі ў прэс-цэнтры.
Ва ўнутрырэспубліканскіх зносінах назначана каля 150 дадатковых паяздоў па асноўных пасажыраўтваральных напрамках, якія злучаюць Мінск з абласнымі цэнтрамі.
"Работа па назначэнні дадатковых паяздоў у міжнародных і ва ўнутрырэспубліканскіх зносінах будзе прадоўжана", - дадалі ў прэс-цэнтры.
Больш падрабязную інфармацыю пра час адпраўлення, маршрут дадатковых паяздоў можна атрымаць на афіцыйным інтэрнэт-сайце Беларускай чыгункі, у мабільным дадатку "БЧ. Мой поезд", а таксама па тэлефоне 105 кантакт-цэнтра.-0-
