8 красавіка, Брэст /Кар. БЕЛТА/. У мемарыяльным комплексе "Брэсцкая крэпасць-герой" 8 красавіка адбылася цырымонія адкрыцця VIII Міжнароднай алімпіяды курсантаў адукацыйных арганізацый вышэйшай адукацыі па ваеннай гісторыі, перадае карэспандэнт БЕЛТА.
У фінальным этапе ўдзельнічаюць нацыянальныя каманды курсантаў ваенна-навучальных устаноў краін СНД. "У гэтай алімпіядзе прымаюць удзел каманды з чатырох дзяржаў. Ваенная акадэмія прадстаўляе Беларусь, а таксама прыехалі каманды з Казахстана, Расіі і Кыргызстана, - расказаў намеснік начальніка Ваеннай акадэміі па вучэбнай рабоце Максім Жураўлёў. - Тэматыка кожны год розная. Знакава, што ў год 80-годдзя вызвалення Рэспублікі Беларусь ад нямецка-фашысцкіх захопнікаў у Брэсце праводзім алімпіяду, прысвечаную наступальнай аперацыі "Баграціён". Для будучых афіцэраў вельмі важна ведаць гісторыю".
У кожную каманду ўвайшлі па пяць удзельнікаў. На працягу некалькіх дзён курсанты будуць змагацца за званне лепшага знатака ваеннай гісторыі. У прыватнасці, чатыры туры будуць складацца з тэстаў і заданняў. Маладыя людзі паспаборнічаюць у гістарычным бліцы, у конкурсе капітанаў і асабістым першынстве.
"Ганаруся, што трапіў у склад каманды. Шлях быў няпросты, у нас было некалькі адбораў. Лічу, што веданне гісторыі дапаможа не паўтарыць памылак мінулага. Як гаварылі вялікія палкаводцы, самая лепшая армія тая, якая не перамагла, а прадухіліла ваенны канфлікт. Няхай у такім ключы нас бачаць патэнцыяльныя праціўнікі, тыя, хто хацеў бы праявіць агрэсію. Бачачы, як абучаны наш асабовы склад, афіцэрскі корпус, будуць разумець, што не трэба. Лепш, чым мір, нічога няма", - падкрэсліў курсант Ваеннай акадэміі Беларусі Ягор Арахоўскі.
Удзельнікі мерапрыемства ўсклалі кветкі да Вечнага агню, ушанавалі памяць абаронцаў Айчыны мінутай маўчання. "Гераізм абаронцаў Брэсцкай крэпасці - яркая старонка нашай агульнай ваеннай гісторыі", - акцэнтаваў увагу старшыня Брэсцкага гарвыканкама Сяргей Лабадзінскі. Ён пажадаў курсантам поспеху ў дасягненні новых вышынь.
Вынікі алімпіяды па ваеннай гісторыі падвядуць 12 красавіка, пераможцам уручаць прызы. Акрамя інтэлектуальных спаборніцтваў удзельнікам прапануюць насычаную культурную праграму. Яны змогуць азнаёміцца з Брэстам і легендарнай цытадэллю над Бугам, выдатнымі мясцінамі Брэсцкай вобласці.
"Апошнім часам шмат выпадкаў, калі фальсіфікуюцца некаторыя факты гісторыі Савецкага Саюза. Выхаванне на аснове праўдзівай інфармацыі, архіўных даных, дзе подзвіг савецкага народа забяспечыў перамогу над фашысцкай Германіяй, - гэта вельмі важна", - перакананы Таірбек Мадымараў - кіраўнік каманды Ваеннага інстытута Узброеных Сіл Кыргызскай Рэспублікі імя К.Усенбекава.
Паводле слоў госця, знамянальна, што фінал алімпіяды па ваеннай гісторыі праходзіць на тэрыторыі Брэсцкай крэпасці, якая з'яўляецца сімвалам мужнасці савецкага народа. "Мы шануем герояў Брэсцкай крэпасці. Яны першымі паказалі ворагам, што такой лёгкай перамогі, як у Еўропе, у іх не будзе. Брэсцкая крэпасць праявіла сілу і мужнасць савецкага народа, рашучасць у перамозе. Правядзенне тут фінальнага этапу алімпіяды - гэта магчымасць азнаёміцца з яе гісторыяй, адчуць атмасферу, разам з равеснікамі з краін СНД ушанаваць памяць нашых герояў", - дадаў Таірбек Мадымараў.